ეზოს  საგაზაფხულო დალაგებაში ბავშვების ჩართვა მხოლოდ სისუფთავეზე ზრუნვა არ არის - ეს მათი პასუხისმგებლობისა და დამოუკიდებლობის განვითარების პროცესია. საერთო სივრცეზე ზრუნვისას ბავშვები სწავლობენ წესრიგს, შრომის კულტურას და აცნობიერებენ, რომ გარემო, სადაც ცხოვრობენ, მათიც არის და მასზე ზრუნვა შეუძლიათ.

ერთობლივი მუშაობა აძლიერებს გუნდურ უნარებს: ისინი სწავლობენ დავალებების განაწილებას, შეთანხმებასა და ერთმანეთის დახმარებას. პროცესში ყალიბდება ურთიერთპატივისცემა და საერთო მიზნისთვის თანამშრომლობის ჩვევა, რაც თანაცხოვრებისთვის მნიშვნელოვანი გამოცდილებაა.

საკუთარი შრომის თვალსაჩინო შედეგი - სუფთა და მოწესრიგებული ეზო ბავშვებში ზრდის თვითშეფასებას და „მე შემიძლია“ განცდას. ამ გზით გარემოზე ზრუნვის კულტურა და პასუხისმგებლიანი დამოკიდებულება ბუნებრივად ყალიბდება.

მცირე საოჯახო ტიპის ბავშვთა სახლების პროექტს ვახორციელებთ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ფინანსური მხარდაჭერით.