მალთაყვის დევნილთა დასახლებაში პარტნიორებთან ერთად ეკოფესტივალს ვუმასპინძლეთ.
ფესტივალის მთავარი გზავნილი „მწვანე მომავალი ჩვენი ეზოდან იწყება“ - მთელი დღის განმავლობაში სხვადასხვა აქტივობით ცოცხლდებოდა. ბავშვები, ახალგაზრდები, ოჯახები და თემის წარმომადგენლები ერთ სივრცეში შეიკრიბნენ, რათა სამართლიანი გადასვლის შესახებ მეტი გაეგოთ, გაეზიარებინათ გამოცდილება და პრაქტიკულად გამოეცადათ მდგრადი გადაწყვეტები.
ფესტივალის სივრცე რამდენიმე თემატურ ზონად იყო დაყოფილი. მონაწილეებს შესაძლებლობა ჰქონდათ გაცნობოდნენ გადამუშავების პრაქტიკებს, მწვანე ტექნოლოგიებს, ეკო-ტრანსპორტის ალტერნატივებსა და ბუნებაზე დაფუძნებულ გადაწყვეტებს. თითოეული აქტივობა ინტერაქტიული და პრაქტიკული იყო - სტუმრები არა მხოლოდ ინფორმაციას იღებდნენ, არამედ თავად ხდებოდნენ პროცესის მონაწილეებიც.
ფესტივალის მნიშვნელოვანი ნაწილი დაეთმო ბუნებაზე დაფუძნებული გადაწყვეტილებების პოპულარიზაციას. მონაწილეებმა გაიცნეს წვიმის ბაღების კონცეფცია - ეკოლოგიურად მდგრადი სისტემა, რომელიც ხელს უწყობს წვიმის წყლის მართვას, ამცირებს ზედაპირული ჩამონადენის რაოდენობას და აუმჯობესებს გარემოს მდგომარეობას. სიმბოლური ხასიათი ჰქონდა მცენარეების ერთობლივ დარგვასაც, რომელშიც ფესტივალის სტუმრები ჩაერთნენ. ეს აქტივობა არა მხოლოდ გარემოზე ზრუნვის პრაქტიკულ მაგალითს წარმოადგენდა, არამედ თემის თანამონაწილეობისა და საერთო პასუხისმგებლობის იდეასაც უსვამდა ხაზს.
ფესტივალის ერთ-ერთი კრეატიული სივრცე ხელნაკეთობებისა და მასტერკლასების ზონა იყო, სადაც ახალგაზრდებმა გამოფინეს გადამუშავებული და მეორადი მასალების გამოყენებით შექმნილი სხვადასხვა დეკორატიული და ყოველდღიური მოხმარების ნივთები. ეს აქტივობა კიდევ ერთხელ ადასტურებდა, რომ ერთი შეხედვით უსარგებლო ნივთებს ახალი სიცოცხლის შეძენა შეუძლია, ხოლო ახალგაზრდების კრეატიულობა და ინიციატივა მდგრადი განვითარების მნიშვნელოვანი რესურსია. მონაწილეებმა არა მხოლოდ საკუთარი შესაძლებლობები წარმოაჩინეს, არამედ სტუმრებსაც გაუზიარეს იდეები იმის შესახებ, თუ როგორ შეიძლება გარემოზე ზრუნვა ყოველდღიური ცხოვრების ნაწილად იქცეს.
განსაკუთრებული ყურადღება დაეთმო ბავშვებისა და ახალგაზრდების ჩართულობასაც. ეკო-ქვესტმა „ეკო განძის მაძიებელი“, შემეცნებითმა თამაშებმა და პრაქტიკულმა დავალებებმა მონაწილეებს შესაძლებლობა მისცა სახალისო ფორმით გაეღრმავებინათ ცოდნა გარემოს დაცვის, რესურსების ეფექტიანი გამოყენებისა და მდგრადი ცხოვრების პრინციპების შესახებ. ფესტივალმა კიდევ ერთხელ აჩვენა, რომ როდესაც სწავლა ინტერაქტიული და გამოცდილებაზე დაფუძნებულია, მიღებული ცოდნა უფრო ღრმა და ხანგრძლივ გავლენას ახდენს.
ღონისძიების განსაკუთრებული სტუმარი იყო საფეხბურთო კლუბი „ოდიში 1919“, რომელმაც ფესტივალს დამატებითი ენერგია და პოზიტიური განწყობა შემატა. კლუბის წარმომადგენლებმა ბავშვებისთვის სახალისო სპორტული აქტივობები და მასტერკლასები გამართეს, გაუზიარეს საკუთარი გამოცდილება და დღის ბოლოს პატარებს ფეხბურთელების ხელმოწერილი ბურთები გადასცეს. ეს ინიციატივა კიდევ ადასტურებს სპორტის, საზოგადოების და ახალგაზრდული განვითარების სფეროების თანამშრომლობის მნიშვნელობას.
ეკოფესტივალმა ნათლად წარმოაჩინა, რომ გარემოზე ზრუნვა იწყება მცირე, ყოველდღიური ნაბიჯებით, ხოლო რეალური ცვლილება მაშინ ხდება, როდესაც მასში მთელი თემი ერთვება. მსგავსი ინიციატივები არა მხოლოდ ეკოლოგიური ცნობიერების ამაღლებას უწყობს ხელს, არამედ აძლიერებს მოქალაქეთა ჩართულობას, პასუხისმგებლობის განცდას და რწმენას, რომ თითოეულ ადამიანს შეუძლია საკუთარი წვლილი შეიტანოს უფრო მწვანე და მდგრადი მომავლის შექმნაში.
საქველმოქმედო ჰუმანიტარული ცენტრი „აფხაზეთი“ პარტნიორებთან ერთად მომავალშიც გააგრძელებს ისეთი ინიციატივების განხორციელებას, რომლებიც ხელს უწყობს გარემოს დაცვას, თემების გაძლიერებას და მდგრადი განვითარების კულტურის დამკვიდრებას, რადგან მწვანე მომავალი ნამდვილად ჩვენი ეზოდან იწყება.
ეკოფესტივალი ჩატარდა გაეროს განვითარების პროგრამისა (UNDP) და დანიის მთავრობის ფინანსური მხარდაჭრით.
- +995 322 944 544
- communications@chca.org.ge
ქუთაისი
Tel.: +995 577 960 444
E-mail: communications@chca.org.ge
თბილისი
Tel.: +995 577 960 444
E-mail: communcations@chca.org.ge
გორი
Tel.: +995 577 960 444
E-mail: gori@chca.org.ge
ზუგდიდი
Tel.: +995 577 960 444
E-mail: zugdidi@chca.org.ge
სოფ. რუხი
Tel.: 032 2 152 911
E-mail: hotline@chca.org.ge
Where We Work
