13 სექტემბერს მცხეთაში ჩატარდა ღონისძიება, რომელსაც დაესწრნენ პროექტის მონაწილე მოზარდები თელავიდან, გორიდან და საგურამოდან. პროექტის ფარგლებში თითოეულ ქალაქში მოზარდებისათვის ჩატარდა 2 თვიანი სოციალური უნარ-ჩვევების ტრენინგები, რომელიც 8 სხვადასხვა თემას (ვერბალური და არავერბალური კომუნიკაცია, აღქმის სუბიექტურობა, კონფლიქტის არსი და გადაჭრის გზები, ქცევის ტიპები, ლიდერობა, გუნდურობა და თვითბრენდინგი) მოიცავდა. მცხეთაში მოზარდების შეხვედრის მიზანი, სწორედ, სოციალური უნარ-ჩვევების ტრენინგებზე მიღებული ცოდნის განახლება და, აგრეთვე, რეგიონის ბავშვების ერთმანეთთან დამეგობრება გახლდათ. გარდა ამისა, პროექტის ფარგლებში მოზარდების ნაწილი გადის სხვადასხვა სტაჟირების კურსს, ნაწილი კი დასაქმებულია. შეხვედრაზე ბავშვებმა ერთმანეთს საკუთარი გამოცდილებაც გაუზიარეს.

ღონისძიება ჩატარდა პროექტის „საზოგადოების სრულფასოვან წევრებად ჩამოყალიბება“ ფარგლებში, რომელსაც ცენტრი „აფხაზეთი“ საქართველოს სამ რეგიონში (კახეთი, შიდა ქართლი, მცხეთა-მთიანეთი) ახორციელებს საზოგადოება „ბილიკთან“ და „დივაინ ჩაილდ ფაუნდეიშენ ოფ ჯორჯიასთან“ ერთად. პროექტის ფინანსური მხარდამჭერია ევროკავსირის წარმომადგენლობა საქართველოში.